呢排奧運成日都聽人講運動員嘅生涯好短暫，而我自己曾經都算係半個運動員。
喺過去跳舞嗰10年裏面，兩個膝頭，左邊手踭，lower back 同右邊肩胛都分別受過唔同程度嘅創傷。慶幸我仲未試過傷到要入醫院嘅地步，但係受傷嘅時候手停口停，要cancel晒所有嘅工作之餘仲要不斷去睇唔同嘅醫生係咁俾錢，就算今次好返又會變成舊患繼續痛落去，真係百般滋味在心頭有苦自己知 。尤其係當你諗翻起自己曾經做到嘅動作而呢一刻完全做唔番出黎，仲要望住你嘅同伴喺呢個時候不斷進步，嗰種無奈同無助真係好氣餒... 呢一種大概就係運動員嘅低潮。
咁究竟運動員嘅犧牲同付出意義何在呢?
我相信無論生活有幾艱苦身體有幾痛都好，每個舞蹈員/運動員只要一踏足台板/賽場，目光即刻射出鬥志，一切煩惱憂愁仿如過眼雲煙瞬間即散，全神貫注去盡力做好呢件事 - 明白有時結果我哋都控制唔到，有時都好講運氣，但起碼大家都曾經盡力燃燒過，即使最後身體唔再俾我地繼續做落去你都唔會討厭自己而且非常驕傲 - 呢啲先至係無悔人生，呢啲先至係人生嘅意義。
愛情又何嘗唔係咁呢?
只要兩個人盡力相愛，唔需要去問亦唔需要去逼對方兩個人自然就會慢慢走到最後嗰步。即使到最後自己盡咗力都唔能夠取代另一個人嘅話，咁咪唔好取代佢囉；即是你真係盡晒力佢仍然講啲九唔搭八嘅藉口黎同你講分手咁咪走囉。更加唔需要因為自己曾經做過一啲戇居嘅嘢而感到羞愧，受傷係一種成長，學識接受自己係一種磨練。唔好成日諗埋啲早知就唔應該揀佢早知就唔應該同佢上床早知點點點… 如果當初我計住跳舞會令我受傷幾多會令我失去啲乜嘢嘅話，就唔會有今日得到更多嘅我 - 人生真係冇得咁樣計，就算錯過跌過都係一種經歷。
雖然人越大越怕受傷害，有時候我都會將個心鎖起怕付出太多，但係我知道對的門會為對的人打開，我知道我仍然有盡力去愛下個人嘅勇氣。共勉之。
Search